La pédagogie

L'objèctiu de Calandreta qu'ei de transméter la lenga e la cultura occitanas aus mainats en bèth assegurà'us ua escolaritat eficaça. L'ensenhament qu'ei bastit suu principi de l'immersion : totas las activitats que's viven en occitan, e deu cp enlà, las lengas occitanas e francesas que son estudiadas de faiçon detalhada. Los contienguts que son fixats per  las Instruccions Oficiaus de l'Educacion Nacionau,  los professors de las escòlas, per estar formats a Aprene, centre de Formacion en Occitan a Besièrs, que son devath de la responsabilitat deus Inspectors de l'Educacion nacionau.

 

La pedagogia calandreta

Calandreta qu'utiliza lo metòde de l'immersion tà valorizar e desvelopar las capacitats deus mainats a entrar dens ua seconda lenga d'un biais equivalent a la purmèra.

L'immersion que permet ua acquisicion naturala de la lenga occitana dens l'arrespècte de la lenga francesa. De la petita seccion enlà, que sensibilizam los mainats a la diversitat lingüistica « Musica de las lengas » ; en primari, que vam desvelopar « Familhas de lengas » per un estudi mei apregonit de las corrèspondencias enter las lengas. La comunicacion dirècta dab locutors vertadièrs que demora l'utis mei utilizat tà desvelopar ua vertadièra empatia cap a las autas lengas dens l'arrespècte de l'aute.

 

Ua pedagogia activa

Lo projècte lingüistic qu'ei estat associat a ua pedagogia activa qui plaça lo mainat com l'actor purmèr deus sons aprentissatges. Que's prem sus las tecnicas Freinet e sus la pedagogia Institucionala : a calandreta, qu'utilizam « Institucions » com lo Conselh, lo Qué i a de nau, los mestièrs...la correspondencia, lo tribalh cooperatiu, l'autoevaluacion...

 

Associà's per har escòla

L'escòla qu'ei co-gerida per l'Estat e per ua associacion on los parents accompanhan lo desvelopament de l'escòla e s'associan aus regents tà miar los projèctes de l'escòla.

Que son los interlocutors deus partenaris financièrs e culturaus : las collèctivitats (mairias, conselhs generaus, regionaus...) e las associacions partenarias...

Cada associacion de basa qu'ei ligada a ua federacion deu departament, qui's liga a las autas federacions de la region. Totas que son representadas per la Confederacion qui gèra las relacions dab lo Ministèri.